SAMAÍN!

O pasado venres, día 30 de outubro, celebramos o Samaín no cole!🎃

Comezamos o día lendo lendas da comarca da Ulloa que foron recollidas polos nenos e nenas do centro. Continuamos con dúas actividades simultáneas; unha delas foi a visita ao túnel do terror, onde o alumnado de 5º e 6º de Educación Primaria asustaron aos compañeiros de compañeiras cos seus arrepiantes disfraces; e outra foi a lectura, por parte dos docentes especialistas de inglés, do libro "Bone Soup" de Lambria Evans, onde o esquelete Fimiguin preparaba unha sopa de ósos deliciosa.🍵

Para quitar o susto co corpo e recargar pilas, celebramos unha chocolatada con churros todos xuntos na cociña.

Rematamos o día cun momento de desfrute ao aire libre, lucindo as nosas galas máis terroríficas! Pasámolo de morte! 👻💀

 COEDUCA: Radio en igualdade

Os nenos e nenas de 6º A e B de Educación Primaria acaban de vivir unha experiencia inesquecible da man de Coeduca. A misión? Aprende sobre igualdade e prevención da violencia de xénero converténdose en profesionais da radio.🎤

Guiados polo fío condutor dun podcast, os rapaces e rapazas falaron sen tabús de todo un pouco: dende a elección de xoguetes por sexos ata medidas tomadas polo goberno para favorecer a igualdade entre homes e mulleres e previr a violencia de xénero. Mesmo nos agasallaron con fantásticos consellos para eliminar expresións machistas do noso día a día.

O mellor de todo? Non só reflexionaron, senón que experimentaron de primeira man como se elabora un programa, controlaron a mesa de mesturas, editaron audios, engadiron efectos de sons e puxeron voz as súas propias ideas.

En definitiva, unha aprendizaxe tan divertida como necesaria para construír, micro a micro, un futuro máis xunto e igualitario. 💪

 UNHA VIAXE ÁS ORIXES DA MÚSICA!🎶

O pasado mércores 14 de outubro, o alumnado de 5º e 6º de Educación Primaria tivo a oportunidade de achegarse a unha interesante charla - concerto sobre a música tradicional.

Ao longo da sesión, as explicacións mesturáronse coa música en directo, permitindo descubrir diferentes instrumentos, coñecer as súas características e comprender mellor a súa orixe, os seus usos e a importancia que tiveron ao longo do tempo.

Pero non todo foi escoitar e aprender! Tamén houbo ocasión de gozar das interpretacións musicais e das cantigas, convertendo a actividade nunha experiencia participativa na que a historia e a tradición cobraron vida a través dos sons.

Unha proposta diferente para descubrir que a música é moito máis ca melodías: é tamén historia, cultura, coñecemento e unha parte fundamental do noso patrimonio.

Descubrimos como, desde tempos antigos, as persoas souberon aproveitar os recursos que lles ofrecía a natureza para facer música: desde o sinxelo son dunha folla ata un corno, demostrando como a creatividade e a imaxinación deron lugar a moitos dos instrumentos que coñecemos hoxe en día. 🍃

Gracias por achegarnos ao fascinante mundo dos instrumentos musicais e axudarnos a escoitar a nosa tradición con outros oídos! 💚

INAUGURAMOS A BIBLIOTECA DO COLE! 📚

A semana pasada vivimos un día moi especial no noso centro: inauguramos a biblioteca escolar! Un espazo pensado para gozar da lectura, descubrir novas historias, aprender e deixar voar a imaxinación.

E para celebrar esta ocasión tan importante, tivemos unhas visitas moi especiais... as nosas mascotas Migas e Anteollos, que se achegaron para compartir con todos nos este momento tan emocionante. 🐭👓

Pero a xornada aínda nos tiña preparada outra sorpresa: 

Pero a xornada aínda nos tiña preparada outra sorpresa: recibimos a visita do grupo de música De Ninghures. Os seus integrantes contáronnos moitas cousas interesantes sobre eles: de onde veñen, que instrumentos tocan e como nace o seu proxecto musical.

Tamén nos falaron do seu disco Feira e descubrimos unha curiosidade que nos fixo especial ilusión: as imaxes que aparecen no disco foron feitas na Feira de Santos de Monterroso. Así, música, tradición e cultura da nosa contorna déronse a man nesta visita tan especial.

E, para rematar, De Ninghures agasallounos cun pequeno concerto que puxo música e alegría á inauguración da nosa biblioteca. 🎶🎻

Foi unha xornada chea de encontros, historias, música e ilusión, na que quedou claro que a biblioteca é moito máis ca un lugar cheo de libros: é un espazo para coñecer, compartir, crear e descubrir novos mundos. 

Agora só queda encher os seus andeis de historias e, sobre todo, encher a biblioteca de lectores e lectoras. 📖🎉

Benvida, biblioteca! Que comece a aventura! 💛

Comezamos un novo curso escolar cheo de ilusión, novos proxectos e moitas ganas de compartir momentos e historias. E temos unha noticia moi especial que estamos desexando contarvos… a apertura da nosa biblioteca escolar está cada vez máis preto! 🎉📖

Será a vindeira semana cando a nosa biblioteca abra de novo as súas portas, e podemos adiantarvos que virá cargada de sorpresas, novidades e moitas aventuras entre libros. 🤩

Pero, antes de recibir a todo o alumnado, xa comezamos a preparar os nosos grandes aliados: os voluntarios e voluntarias da biblioteca. 🦔📚

Para iniciar a súa formación dunha maneira divertida e diferente, realizamos un escape room bibliotecario no que tiveron que superar diferentes retos e pistas para descubrir como está organizada a biblioteca e, sobre todo, aprender a localizar os libros nas distintas zonas nas que se distribúe.

Entre enigmas, probas e moitas ganas de participar, os nosos voluntarios e voluntarias convertéronse por un intre en auténticos detectives da biblioteca. 🔎📚

Este é só o comezo de todo o que temos preparado para este novo curso.

A conta atrás xa comezou… ⏳

Estades preparados para descubrir todo o que agocha? ✨📖

O curso remata... e o noso xornal escolar xa está aquí!

Chegou o momento! 

O curso 2025-2026 chega ao seu fin e, con el, as agardadas vacacións de verán. Foron meses de moito traballo, lecturas, aprendizaxes e momentos inesquecibles entre os andeis da nosa biblioteca. Pero antes de pechar as portas ata setembro, queremos celebrar convosco unha gran noticia:

Por fin sae á luz o novo número do noso Xornal Escolar! 

Este proxecto é o broche de ouro perfecto para o ano académico, xa que recolle a ilusión, o esforzo e o talento de toda a nosa comunidade educativa. 

Queremos darvos as grazas de corazón a todos e cada un de vós por facelo posible, pola vosa creatividade e por encher de vida a biblioteca un ano máis.

Podes ler o Xornal Escolar en formato dixital premendo na imaxe:

Agora si... toca descansar, ler moito e recargar pilas! 

Moi feliz verán a todas e a todos! Ata o vindeiro curso!

Escolma de Cantigas

 A finais do curso 24/25, o alumnado de Infantil e Primaria do CEIP Plurilingüe de Monterroso recolleu entre os seus achegados as pezas que compoñen esta publicación.
A elaboración desta escolma de cantigas era un proxecto pendente desde o ano pasado que retomamos con moita ilusión. Con el, queremos render un tributo particular a todas as persoas que coidan e transmiten a nosa música, lingua e cultura.

Grazas de corazón a todo o alumnado, ás familias e ao pobo de Monterroso pola súa implicación e xenerosidade. 
Moitísimas grazas!