INAUGURAMOS A BIBLIOTECA DO COLE! 📚

A semana pasada vivimos un día moi especial no noso centro: inauguramos a biblioteca escolar! Un espazo pensado para gozar da lectura, descubrir novas historias, aprender e deixar voar a imaxinación.

E para celebrar esta ocasión tan importante, tivemos unhas visitas moi especiais... as nosas mascotas Migas e Anteollos, que se achegaron para compartir con todos nos este momento tan emocionante. 🐭👓

Pero a xornada aínda nos tiña preparada outra sorpresa: 

Pero a xornada aínda nos tiña preparada outra sorpresa: recibimos a visita do grupo de música De Ninghures. Os seus integrantes contáronnos moitas cousas interesantes sobre eles: de onde veñen, que instrumentos tocan e como nace o seu proxecto musical.

Tamén nos falaron do seu disco Feira e descubrimos unha curiosidade que nos fixo especial ilusión: as imaxes que aparecen no disco foron feitas na Feira de Santos de Monterroso. Así, música, tradición e cultura da nosa contorna déronse a man nesta visita tan especial.

E, para rematar, De Ninghures agasallounos cun pequeno concerto que puxo música e alegría á inauguración da nosa biblioteca. 🎶🎻

Foi unha xornada chea de encontros, historias, música e ilusión, na que quedou claro que a biblioteca é moito máis ca un lugar cheo de libros: é un espazo para coñecer, compartir, crear e descubrir novos mundos. 

Agora só queda encher os seus andeis de historias e, sobre todo, encher a biblioteca de lectores e lectoras. 📖🎉

Benvida, biblioteca! Que comece a aventura! 💛

Comezamos un novo curso escolar cheo de ilusión, novos proxectos e moitas ganas de compartir momentos e historias. E temos unha noticia moi especial que estamos desexando contarvos… a apertura da nosa biblioteca escolar está cada vez máis preto! 🎉📖

Será a vindeira semana cando a nosa biblioteca abra de novo as súas portas, e podemos adiantarvos que virá cargada de sorpresas, novidades e moitas aventuras entre libros. 🤩

Pero, antes de recibir a todo o alumnado, xa comezamos a preparar os nosos grandes aliados: os voluntarios e voluntarias da biblioteca. 🦔📚

Para iniciar a súa formación dunha maneira divertida e diferente, realizamos un escape room bibliotecario no que tiveron que superar diferentes retos e pistas para descubrir como está organizada a biblioteca e, sobre todo, aprender a localizar os libros nas distintas zonas nas que se distribúe.

Entre enigmas, probas e moitas ganas de participar, os nosos voluntarios e voluntarias convertéronse por un intre en auténticos detectives da biblioteca. 🔎📚

Este é só o comezo de todo o que temos preparado para este novo curso.

A conta atrás xa comezou… ⏳

Estades preparados para descubrir todo o que agocha? ✨📖

O curso remata... e o noso xornal escolar xa está aquí!

Chegou o momento! 

O curso 2025-2026 chega ao seu fin e, con el, as agardadas vacacións de verán. Foron meses de moito traballo, lecturas, aprendizaxes e momentos inesquecibles entre os andeis da nosa biblioteca. Pero antes de pechar as portas ata setembro, queremos celebrar convosco unha gran noticia:

Por fin sae á luz o novo número do noso Xornal Escolar! 

Este proxecto é o broche de ouro perfecto para o ano académico, xa que recolle a ilusión, o esforzo e o talento de toda a nosa comunidade educativa. 

Queremos darvos as grazas de corazón a todos e cada un de vós por facelo posible, pola vosa creatividade e por encher de vida a biblioteca un ano máis.

Podes ler o Xornal Escolar en formato dixital premendo na imaxe:

Agora si... toca descansar, ler moito e recargar pilas! 

Moi feliz verán a todas e a todos! Ata o vindeiro curso!

Escolma de Cantigas

 A finais do curso 24/25, o alumnado de Infantil e Primaria do CEIP Plurilingüe de Monterroso recolleu entre os seus achegados as pezas que compoñen esta publicación.
A elaboración desta escolma de cantigas era un proxecto pendente desde o ano pasado que retomamos con moita ilusión. Con el, queremos render un tributo particular a todas as persoas que coidan e transmiten a nosa música, lingua e cultura.

Grazas de corazón a todo o alumnado, ás familias e ao pobo de Monterroso pola súa implicación e xenerosidade. 
Moitísimas grazas!

Grandes voces para grandes mulleres: O noso alumnado estréase no mundo do podcast!

Hai días na biblioteca que fican gravados no corazón... e, desta volta, tamén nas ondas! Con motivo do 8 de Marzo, Día Internacional da Muller,  o noso cole convertiuse nun auténtico estudio de radio.

Para a gran maioría do noso alumnado, esta foi a súa primeira experiencia gravando un podcast, e non puido ser de mellor xeito: dando voz e poñendo en valor a vida e o legado de dez mulleres galegas excepcionais que fixeron historia.

Os nenos e nenas colgaron os micros e, con moito entusiasmo (e algún que outro nervio de artista!), foron os encargados de contarnos as fazañas de dez referentes absolutas da nosa cultura, ciencia e deporte: Rosalía de Castro, María Barbeito, Susana Rodríguez Gacio,  Ana Peleteiro, Isabel Zendal, Eugenia Osterberger, María Pita, Maruxa Mallo, Concepción Arenal e María Victoria Moreno.

Ver aos máis pequenos de Infantil asombrados diante do micrófono e aos de Primaria lendo con tanta soltura e emoción foi un auténtico agasallo. Con esta actividade non só aprendemos sobre a historia e o feminismo, senón que tamén traballamos a expresión oral, o traballo en equipo e perdemos o medo escénico.

Queremos dar os parabéns a todo o alumnado polo seu gran traballo, polo respecto co que prepararon os textos e por encher o noso cole de tanta maxia radiofónica.

Xa podes escoitalos! 

 Viva o 8 de marzo e vivan as nosas pequenas grandes voces! 

O club de lectura vai de visita!

 

Hoxe o alumnado de 5º e 6º de Primaria que forma parte do Club de lectura tivo unha saída moi especial. Deixamos por unhas horas os nosos libros para visitar a biblioteca do IES de Monterroso. E vaia acollida nos tiñan preparada!

Alí esperábanos o alumnado do club de lectura do instituto. Foi un encontro xenial no que compartimos experiencias e no que os maiores nos contaron todo o que estiveron a facer ao longo deste curso. Deixáronnos abraiados con algunhas das súas iniciativas, como a gravación de podcasts literarios ou a creación de recensións súper creativa

so!

Para redondear unha mañá perfecta de intercambio cultural e moitas risas, compartimos un momento delicioso tomando xuntos un chocolate con churros que nos soubo a gloria.

Queremos agradecer de todo corazón á comunidade do IES de Monterroso e, en especial, ao seu club de lectura, o ben que nos trataron e o agarimo con que nos recibiron.

Gozamos moitísimo da experiencia! Deixámosvos unhas cantas fotos da xornada para que vexades o ben que o pasamos:

"Fotobiblio": O noso curso en imaxes!

 Cada vez que subes ou baixas os chanzos do colexio, estás a dar un paseo polos mellores momentos do curso! Xa te fixeches parar no noso recuncho "Fotobiblio"?

Situado nas escaleiras, este espazo tan visual converteuse no álbum de recordos vivente da nosa biblioteca. Nel fomos colgando, semana a semana, as fotos de todas as actividades, obradoiros, contacontos e sorpresas que compartimos xuntos.

É o lugar perfecto para buscarte coas túas amizades, lembrar as risas dos días especiais e ver todo o que fomos quen de crear este ano grazas á Biblitoteca.

Cal foi a túa actividade favorita do ano? Búscaa na parede!